බන්ධනාගාරගත කර සිටින ගලගොඩඅත්තේ ඥානසාර හිමියන් අධිකරණයට රැගෙන යාමේදී උන්වහන්සේගේ චීවරය ඉවත් කිරීමේ සිදුවීම මුල්කරගනිමින් මේ වන විට උණුසුම් දේශපාලන හා නීතිමය සංවාදයක් නිර්මාණය වී තිබේ. බන්ධනාගාර නිත්‍ය නියෝග අර්ථකථනය කිරීම සම්බන්ධයෙන් එක්සත් ජාතික පක්ෂය සහ රජය අතර මතුව ඇති මෙම ගැටුම, නීතියේ පවතින හිඩැස් මෙන්ම දේශපාලන ප්‍රකාශනවල වගකීම පිළිබඳව ද බරපතළ ප්‍රශ්න මතුකරන්නකි.
මෙම අර්බුදයේ ආරම්භය සනිටුහන් වන්නේ ඔක්තෝබර් 14 වැනිදා එක්සත් ජාතික පක්ෂය විසින් නිකුත් කරන ලද දැඩි නිවේදනයක් සමගිනි. ඒකාබද්ධ විපක්ෂයේ කැඳවුම්කරු මහාචාර්ය ජී. එල්. පීරිස්ගේ අදහස් උපුටා දක්වමින් එම නිවේදනයෙන් රජයට චෝදනා කර තිබුණේ, බන්ධනාගාරගත ආගමික නායකයින් පිටතට රැගෙන යාමේදී අඳිනු ලබන ඇඳුම ගැන නිර්දේශ දීමට කමිටුවක් පත්කිරීම හුදු 'ඇස් බැන්දුමක්' බවයි.
මහාචාර්යවරයාගේ තර්කය වූයේ ඒ සඳහා අමුතුවෙන් කමිටුවක් අවශ්‍ය නොවන බවත්, බන්ධනාගාර පනතේ නිත්‍ය නියෝග 550 යටතේ ඒ පිළිබඳව පැහැදිලි මඟපෙන්වීමක් දැනටමත් පවතින බවත්ය. උසාවියට ගෙන යන වරදකරු වූ සිරකරුවෙකු බන්ධනාගාර නිල ඇඳුමෙන් ඉදිරිපත් නොකළ යුතු බවත්, ඔහුට සමාජයේ ජීවත්වන විට ඇඳීමට පුරුදුව සිටි සිවිල් ඇඳුමක් හෝ අදාළ ආගමික, සංස්කෘතික පසුබිමට ගැළපෙන වස්ත්‍රයක් ඇඳීමට අවසර දිය යුතු බවත් එම නියෝගයේ දැක්වෙන බව එක්සත් ජාතික පක්ෂය පෙන්වා දුන්නේය. මේ බව පැහැදිලිව තිබියදී කමිටු පත් කිරීම ප්‍රශ්නය යටගැසීමේ වංක ප්‍රයත්නයක් ලෙස හෙළාදකින බව ද, රජය වහාම සියම් මහා නිකායේ කෝට්ටේ ශ්‍රී කල්‍යාණී සාමග්‍රිධර්ම මහා සංඝසභාවේ මහානායක හිමිපාණන් ඇතුළු සංඝසභාව හමුවට ගොස් ඥානසාර හිමියන්ගේ සිවුර ඉවත් කිරීම ගැන සමාව අයැද සිටිය යුතු බව ද ඔවුන් අවධාරණය කර තිබුණි.
එහෙත්, මෙම චෝදනාවට රජය පාර්ශ්වයෙන් එල්ල වූයේ ප්‍රබල ප්‍රතිචාරයකි. අධිකරණ සහ ජාතික ඒකාබද්ධතා අමාත්‍ය නීතිඥ හර්ෂණ නානායක්කාර විශේෂ නිවේදනයක් නිකුත් කරමින් එක්සත් ජාතික පක්ෂයට චෝදනා කළේ, සංවේදී කරුණක් සම්බන්ධයෙන් නීතියේ එක් කොටසක් පමණක් උපුටා දක්වමින් හිතාමතාම මහජනතාව නොමග යවන සුළු විකෘති අදහසක් සමාජගත කර ඇති බවයි.
අමාත්‍යවරයා පෙන්වා දෙන පරිදි අර්බුදයේ සැබෑ ස්වභාවය සැඟවී ඇත්තේ බන්ධනාගාර නිත්‍ය නියෝග 550 හි සම්පූර්ණ අන්තර්ගතය සහ ඥානසාර හිමියන්ට නියම වී ඇති දඬුවමේ කාලසීමාව තුළය. නිත්‍ය නියෝග 550 හි මූලික කරුණු තුනක් අන්තර්ගත වන අතර, ඉන් පළමුවැන්නෙන් සිරකරුවන් බන්ධනාගාර ඇඳුමින් උසාවියට ගෙන නොයා යුතු බව කියැවේ. දෙවැන්නෙන් කියැවෙන්නේ වසර තුනක හෝ ඊට අඩු සිරදඬුවම් ලැබූවන්ට සිය පෞද්ගලික ඇඳුම් පැළඳ බන්ධනාගාරයෙන් බැහැරවීමට අවස්ථාව ඇති බවයි. ගැටලුව මතු වන්නේ එහි තුන්වන කරුණෙනි. වසර තුනකට වඩා වැඩි සිරදඬුවමක් ලැබූවන්ට පෞද්ගලික ඇඳුම් ඇඳීමට අවසර නැති අතර, ඔවුන්ට ලබාදිය යුත්තේ බන්ධනාගාරයේ උපකරණ ගබඩාවේ ඇති 'ඒ' හෝ 'බී' චක්‍රයට අයත්, බන්ධනාගාර රෙදිපිළි බවට හඳුනාගත නොහැකි විශේෂිත ඇඳුම් කට්ටලයකි.
මෙම නීතිමය පදනම මත ඥානසාර හිමියන්ගේ තත්ත්වය මුළුමනින්ම වෙනස් මානයකට යොමුවේ. අමාත්‍යවරයා පෙන්වා දෙන පරිදි උන්වහන්සේට හිමිව ඇත්තේ වසර හයක සිරදඬුවමකි. එබැවින් නිත්‍ය නියෝග 550 හි දෙවන කොටස උන්වහන්සේට අදාළ නොවන අතර, අදාළ වන්නේ තුන්වන කොටසයි. එහෙත් එම නීතියට අනුව සැපයෙන 'ඒ' සහ 'බී' වස්ත්‍ර කාණ්ඩ තුළ භික්ෂූන් වහන්සේ නමක් අඳින චීවරය අන්තර්ගත වී නැත. කමිටුවක් පත්කිරීමට රජයට සිදුවූයේ අන්න ඒ නීතිමය රික්තය පිරවීම සඳහාය.
මේ අනුව භික්ෂූන් වහන්සේලා සමග පැවති සාකච්ඡාවලින් අනතුරුව රැස්වූ විශේෂ කමිටුව විසින් මෙතෙක් පැවති එම අඩුපාඩුව නිවැරදි කරමින් නව නිර්දේශයක් ඉදිරිපත් කර තිබේ. ඉන් යෝජනා කර ඇත්තේ, වසර තුනකට වැඩි සිරදඬුවමක් ලැබූ භික්ෂුවකට වුවද, තම නිකායේ හෝ පාර්ශ්වයේ අනුමැතියට යටත්ව බන්ධනාගාරයෙන් බැහැරවීමේදී සිය චීවරය පැළඳීමට අවස්ථාව ලබාදෙන ලෙස නිත්‍ය නියෝග සංශෝධනය කළ යුතු බවයි.
අඩක් කියවූ නීතියක් මගින් සමාජයේ කොතරම් දුරට නොමග යැවීම් සිදුකළ හැකිද යන්න මෙම සමස්ත සිදුවීමෙන් මනාව පිළිඹිබු වේ. එහෙත් අවසානයේදී, නීතියේ පැවති තාක්ෂණික හිඩැසක් ආගමික ගෞරවයට හානියක් නොවන අයුරින් නිරාකරණය කරගැනීම සඳහා බන්ධනාගාර නීති පද්ධතිය තුළම සංශෝධනයක් සිදුකිරීමට මෙම ආන්දෝලනාත්මක සිදුවීම නිමිත්තක් වී තිබේ.
No comments:
Post a Comment