මෑත කාලීනව කතාබහකට ලක්වූ 'සිවුරේ සිද්ධියට' මුවා වෙමින් රට තුළ අස්ථාවරත්වයක් මෙන්ම කඩාකප්පල්කාරී වාතාවරණයක් නිර්මාණය කිරීමට උත්සාහ ගන්නා විවිධ පුද්ගලයන්ට එරෙහිව දැඩිව නීතිය ක්‍රියාත්මක කරන බව රජය පවසයි. මහජන ආරක්ෂක සහ පාර්ලිමේන්තු කටයුතු අමාත්‍ය ආනන්ද විජේපාල මහතා අවධාරණය කරන්නේ, මේ වන විටත් එවැනි පිරිස් සම්බන්ධයෙන් කරුණු සොයා බැලීම සඳහා බුද්ධි අංශ කණ්ඩායම් යොදවා ඇති බවයි.
කවර තත්ත්වයක් යටතේ වුවද රට අස්ථාවර කිරීමට කිසිසේත්ම ඉඩ නොතබන බව ඔහු තරයේ ප්‍රකාශ කර සිටියි.කෙසේ වෙතත්, ජාතික ආරක්ෂාව තහවුරු කිරීමේ මෙම දැඩි ප්‍රතිපත්තිය තුළ වුවද, පුරවැසියන්ගේ ප්‍රජාතන්ත්‍රවාදී අයිතීන් සඳහා පූර්ණ ඉඩප්‍රස්ථා හිමිව ඇති බව අමාත්‍යවරයා පෙන්වා දෙයි. සාමකාමී පා ගමන් මෙන්ම නිදහස් උද්ඝෝෂණ පැවැත්වීමට වත්මන් රජයෙන් කිසිදු බාධාවක් නොමැත. මහජනතාවට බාධාවක් නොවන අයුරින් සාමකාමීව වාඩි වී උද්ඝෝෂණයේ නිරත වීමට දිනක් හෝ දෙකක් නොව, අවශ්‍ය නම් වසර දෙක තුනක් වුවද කිසිදු බාධාවකින් තොරව අවකාශය පවතින බව පවසන ආනන්ද විජේපාල මහතා, රජය එම අයිතිය ඉතා හොඳින් ආරක්ෂා කරන බවට සහතික වෙයි.
මේ අතර, අර්බුදයට තුඩු දුන් සිවුරේ ප්‍රශ්නය සම්බන්ධයෙන් ද රජය මේ වන විටත් අවශ්‍ය පියවර ගෙන තිබේ. ඒ සඳහා ජනාධිපතිවරයා විසින් විශේෂ කමිටුවක් පත් කරමින් සුදුසු ක්‍රියාමාර්ග ගෙන ඇති බව අමාත්‍යවරයා සඳහන් කරයි. එහෙත්, මෙම ගැටලුව විසඳීමේදී අධිකරණය විසින් ලබා දී ඇති තීන්දුවලට පිටින් යමින් කටයුතු කිරීමට ජනාධිපතිවරයා කිසිසේත් සූදානම් නොමැති බව ඔහු වැඩිදුරටත් පැහැදිලි කළේය.
අතීතයේදී නීතියට පිටින් යමින් ලබා දුන් ඇතැම් ජනාධිපති සමාවන් පවා පසුව අධිකරණය විසින්ම අහෝසි කර දැමූ ආකාරය අමාත්‍යවරයා මෙහිදී ආවර්ජනය කළේය. එකී පසුබිම සිහිපත් කරන මහජන ආරක්ෂක අමාත්‍යවරයා, වත්මන් පාලනය යටතේ නීතියේ ආධිපත්‍යයට ඉහළින් කිසිදු ක්‍රියාමාර්ගයක් නොගන්නා බව තවදුරටත් අවධාරණය කර සිටියි.
No comments:
Post a Comment