විදෙස් ජාතිකයන් සිව්දෙනෙකු සම්බන්ධයෙන් ක්‍රියාත්මක වූ කොකේන් ජාවාරමක තවත් තීරණාත්මක තොරතුරක් කොළඹ ජාතික රෝහලෙන් අනාවරණය වී තිබේ. ඒ, අත්අඩංගුවට පත් විදෙස් ජාතික කාන්තාවකගේ සිරුර තුළ සූක්ෂම ලෙස සඟවා තිබූ තවත් කොකේන් මත්ද්‍රව්‍ය ප්‍රමාණයක් රෝහල් පරීක්ෂණ අතරතුරදී සොයාගැනීමත් සමඟිනි.
මෙම සිදුවීමේ ආරම්භය සටහන් වන්නේ 2026 ඔක්තෝබර් 12 වැනිදා සන්ධ්‍යාවේදීය. ලද තොරතුරකට අනුව කොළඹ දිසා අපරාධ කොට්ඨාසයේ නිලධාරීන් කණ්ඩායමක් විසින් කොල්ලුපිටිය පොලිස් වසමේ පිහිටි හෝටලයක් සහ සුපිරි වෙළෙඳසැල් සංකීර්ණයක් කේන්ද්‍ර කරගනිමින් විශේෂ මෙහෙයුමක් දියත් කරන ලදී. එහි ප්‍රතිඵලයක් ලෙස කොකේන් මත්ද්‍රව්‍ය කිලෝග්‍රෑම් 01යි ග්‍රෑම් 46ක් සමඟ විදෙස් ජාතික සැකකරුවන් දෙදෙනෙකු සහ සැකකාරියන් දෙදෙනෙකු නීතියේ රැහැනට කොටුකර ගැනීමට විමර්ශන නිලධාරීහු සමත් වූහ.
අනතුරුව අත්අඩංගුවට ගත් සැකකරුවන් සහ සැකකාරියන් කොටුව මහේස්ත්‍රාත් අධිකරණය වෙත ඉදිරිපත් කෙරුණු අතර, එහිදී ලබාගත් දින හතක රැඳවුම් නියෝග මත ඔවුන්ගෙන් තවදුරටත් විමර්ශන කටයුතු සිදුකරගෙන යනු ලැබිණි. මෙම විමර්ශන අතරතුර, අදාළ සැකකරුවන් තම සිරුරු තුළ ද මත්ද්‍රව්‍ය සඟවාගෙන ඇත්දැයි පරීක්ෂා කිරීම සඳහා අධිකරණයෙන් විශේෂ නියෝගයක් ලබාගැනීමට විමර්ශකයෝ පියවර ගත්හ.
ඒ අනුව, පසුගිය 16 වැනිදා මෙම පිරිස කොළඹ ජාතික රෝහල වෙත ඇතුළත් කර නේවාසිකව රඳවා පරීක්ෂාවට ලක් කෙරිණි. එහිදී එක් විදෙස් ජාතික සැකකාරියකගේ සිරුරෙන් පිටකරන ලද, ආවරණය කර සඟවා තිබූ කොකේන් මත්ද්‍රව්‍ය ග්‍රෑම් 80යි මිලිග්‍රෑම් 09ක ප්‍රමාණයක් සොයාගැනීමට හැකි වී ඇත.
මෙම අත්අඩංගුවට ගැනීම් සහ ඊට සම්බන්ධ ජාලය පිළිබඳව කොළඹ දිසා අපරාධ කොට්ඨාසය විසින් මේ වනවිටත් වැඩිදුර විමර්ශන මෙහෙයවමින් පවතී.
No comments:
Post a Comment