ඉරාකයේ සිට එල්ල වූ ඩ්රෝන ප්රහාර හේතුවෙන් තමන්ගේ ප්රධානතම තෙල් අපනයන නල මාර්ගයක් තාවකාලිකව වසා දැමීමට සවුදි අරාබි බලධාරීන් පියවර ගෙන තිබේ. මැදපෙරදිග පවතින උග්ර යුධමය වාතාවරණය හමුවේ ඉරානය විසින් හෝමුස් සමුද්ර සන්ධිය වසා දැමීම නිසා ඇති වූ බාධාවන් මඟහැරීම සඳහා සවුදි අරාබිය අබ්කයින් ප්රදේශයේ සිට රතු මුහුදේ යාන්බු වරාය දක්වා දිවෙන "නැගෙනහිර-බටහිර" නල මාර්ගය භාවිත කිරීම සැලකිය යුතු ලෙස ඉහළ නංවා තිබුණි.
රියාද් සහ මදීනා කලාප හරහා ඇදී යන මෙම තෙල් නල මාර්ගය ඉලක්ක කරගනිමින් ඉරාක භූමියේ සිට එල්ල වූ ඩ්රෝන ප්රහාර කිහිපය සවුදි විදේශ කටයුතු අමාත්යාංශය මෙන්ම බලශක්ති අමාත්යාංශය විසින් ද දැඩි ලෙස හෙළා දැක ඇත. මෙම ප්රහාරය හේතුවෙන් පූර්වාරක්ෂක පියවරක් ලෙස නල මාර්ගයේ කටයුතු අත්හිටවූ බවත්, සිද්ධියෙන් පුද්ගලයින් කිහිපදෙනෙකු තුවාල ලබා දේපළ හානි සිදු වී ඇති බවත් බලධාරීහු තහවුරු කරති. කෝපර්නිකස් සෙන්ටිනල් චන්ද්රිකා මගින් ලබාගත් ඡායාරූපවල මදීනා ප්රදේශය ආසන්නයේ නල මාර්ගය ඔස්සේ කළු දුමාරයක් නැගෙමින් පවතින ආකාරය සටහන් වී තිබේ.
මෙම ප්රහාරය ඉරාකයේ මයිසාන් දකුණු පළාතෙන් එල්ල වූ බව ඉරාක අගමැති අලි අල්-සායිදිගේ කාර්යාලය තහවුරු කර ඇති අතර, ඊට වහාම ක්රියාත්මක වූ අග්රාමාත්යවරයා අදාළ පළාතේ හමුදා අණදෙන නිලධාරියා ධුරයෙන් ඉවත් කිරීමට පියවර ගෙන තිබේ. තම භූමිය යොදාගනිමින් සවුදි අරාබියට එල්ල කළ මෙම ප්රහාරය හෙළාදකින බව ප්රකාශ කළ ඉරාක රජය, මේ පිළිබඳව පූර්ණ පරීක්ෂණයක් ආරම්භ කර ඇති බව ද සඳහන් කළේය.
ඉරාක අග්රාමාත්යවරයාගේ විශේෂ ඉල්ලීම සලකා බලමින් මේ මොහොතේ හමුදාමය ප්රතිචාර දැක්වීමෙන් වැළකී සිටීමට සවුදි අරාබිය තීරණය කර ඇති අතර, ඉරාක භූමියෙන් එල්ල වන ප්රහාර වැළැක්වීමට එරට රජය ගන්නා උත්සාහයන්ට සහාය දැක්වීමට එකඟ වී ඇත. කෙසේ වෙතත් තම රටේ ආරක්ෂාව සහ දේපළ සුරැකීම වෙනුවෙන් අවශ්ය ඕනෑම පියවරක් ගැනීමේ පූර්ණ අයිතිය තමන් සතුව පවතින බව රියාද් පාලනය අවධාරණය කරයි. මේ අතර බහරේනය, ජෝර්දානය, කටාර් රාජ්යය සහ ගල්ෆ් සහයෝගිතා කවුන්සිලය ද මෙම ප්රහාරය කලාපීය ආරක්ෂාවට එල්ල වූ බරපතල තර්ජනයක් ලෙස හෙළා දැක තිබේ.
කලාපයේ ඇති වී තිබෙන මෙම නොසන්සුන්කාරී තත්ත්වය හමුවේ ලෝක වෙළඳපොළේ බොරතෙල් බැරලයක මිල ඩොලර් 100 සීමාව ඉක්මවා ගොස් ඇති අතර ඇමරිකාවේ ඩීසල් මිල ද සැලකිය යුතු ලෙස ඉහළ ගොස් ඇත. මේ අතර, යේමන රජයට සහාය දක්වන සවුදි අරාබියට එරෙහිව හූති කැරලිකරුවන් විසින් රතු මුහුදේ නාවික බාධා පනවා ඇති අතර, බැබ් එල්-මන්දෙබ් සමුද්ර සන්ධියේ පිහිටි උපායමාර්ගික දූපත්වල පාලනය තහවුරු කරගනිමින් සවුදි අරාබිය හැර අන් සියලු රටවල නෞකාවලට එහි ගමනාගමනය ආරක්ෂිත බව හූති සංවිධානය ප්රකාශ කර තිබේ.
No comments:
Post a Comment