ඊයේ (23) සන්ධ්‍යාවේ නිට්ටඹුව නගරයේ පිහිටි යන්ත්‍රෝපකරණ සහ විදුලි උපකරණ අලෙවි කරන මෙන්ම කුලියට ලබාදෙන වෙළෙඳසැලක හදිසි ගින්නක් හටගෙන තිබේ. 'Figo Collection' නම් වූ මෙම වෙළෙඳසැලේ හටගත් ගින්න පාලනය කිරීම සඳහා දැඩි පරිශ්‍රමයක් දැරීමට සිදුවූ බව වාර්තා වේ.
නිට්ටඹුව පොලිසිය සැක පළ කරන්නේ විදුලිය යළි ලැබීමත් සමග ඇතිවූ විදුලි කාන්දුවක් මීට හේතු වන්නට ඇති බවයි. ප්‍රදේශයේ විදුලිය විසන්ධි වී තිබූ අවස්ථාවක වෙළෙඳසැලේ හිමිකරු එය වසා දමා සිය නිවසට ගොස් තිබුණි. අනතුරුව රාත්‍රී 7.00ට පමණ යළි විදුලිය ලැබී සුළු වේලාවකට පසු වෙළෙඳසැලේ ඉහළ කොටසේ මෙම ගින්න හටගෙන ඇති බව පොලිස් විමර්ශනවලදී මූලිකව අනාවරණය වී ඇත.
ගින්න මැඩපැවැත්වීම සඳහා ගිනි නිවීමේ රථ දෙකක් යොදවා තිබූ බව නිට්ටඹුව පොලිසිය සඳහන් කරයි. කෙසේ වෙතත්, ගින්න වේගයෙන් පැතිර යාම හේතුවෙන් එය ගිනි නිවන රථවලට ද පහසුවෙන් මෙල්ල කරගැනීමට නොහැකි වූ තත්ත්වයක් මූලිකව වාර්තා වී තිබුණි. ඒ අනුව ගිනි නිවන ඒකකයේ දැඩි උත්සාහය මත ගින්න පාලනය කිරීමේ කටයුතු සිදු කෙරිණි.
සිද්ධියෙන් වෙළෙඳසැලට සහ එහි වූ දේපළවලට සිදුවූ සම්පූර්ණ හානිය සම්බන්ධයෙන් මෙතෙක් කිසිදු නිශ්චිත තක්සේරුවක් සිදුකර නොමැත. ගින්නට හේතුව මෙතෙක් නිශ්චිතවම තහවුරු කර නොමැති අතර, සිද්ධිය සම්බන්ධයෙන් නිට්ටඹුව පොලිසිය විසින් තවදුරටත් වැඩිදුර පරීක්ෂණ ක්‍රියාත්මක කරමින් පවතී.
No comments:
Post a Comment