විදේශගතව සිටින දෙමාපියන්ගෙන් දුරස්ව මිත්තණියගේ රැකවරණය මැද හැදී වැඩුණු පහළොස් හැවිරිදි දැරියකගේ ජීවිතය හදිසි අනතුරකින් නිමා වීමේ ඛේදනීය පුවතක් ග්‍රෑන්ඩ්පාස් ප්‍රදේශයෙන් වාර්තා වෙයි.
ග්‍රෑන්ඩ්පාස් ලෙයාර්ඩ්ස් බ්‍රෝඩ්වේ නිවාස සංකීර්ණයේ තෙවැනි මහලෙන් පහළට ඇද වැටී මෙලෙස අවාසනාවන්ත ලෙස ජීවිතක්ෂයට පත්ව ඇත්තේ එම්. රුෂ්ඪ රාධා නැමැති දැරියයි. ග්‍රෑන්ඩ්පාස් පොලිසිය සඳහන් කරන ආකාරයට මෙම මාරාන්තික අනතුර සිදුව ඇත්තේ පසුගිය 27 වැනිදා සවස් භාගයේදීය.
පොලිස් විමර්ශනවලට අනුව, මියගිය දැරියගේ මව සහ පියා කටාර් රාජ්‍යයේ රැකියාවල නිරතව සිටිති. දෙමාපියන්ගේ නොමැති අඩුව මැද ඇය මෙලෙස හැදී වැඩී ඇත්තේ සිය මිත්තණියගේ සෙවණේය.
අනතුර සිදුවන අවස්ථාවේදීත් දැරියගේ මිත්තණිය නිවසේ රැඳී සිට තිබේ. හදිසියේම ඇසුණු ශබ්දයක් සමග ඒ පිළිබඳව විමසිලිමත් වීමේදී ඇය දැක ඇත්තේ, සිය මිණිබිරිය තුවාල ලබා පහළට වැටී සිටින අයුරුයි. වහාම ක්‍රියාත්මක වී දැරිය බොරැල්ල රිජ්වේ ආර්යා ළමා රෝහල වෙත ඇතුළත් කිරීමට පියවර ගෙන තිබුණද, එහි ප්‍රතිකාර ලබමින් සිටියදී සුළු වේලාවකින් ඇය අවසන් හුස්ම හෙළා ඇතැයි පොලිසිය තහවුරු කරයි.
මෙම අවාසනාවන්ත මරණය සම්බන්ධයෙන් විමර්ශන ආරම්භ කර ඇති ග්‍රෑන්ඩ්පාස් පොලිසිය, සිද්ධිය වූ අවස්ථාවේ නිවසේ සිටි මිත්තණියගෙන් මෙන්ම එම නිවසේම පදිංචිව සිටින දැරියගේ බාප්පා ඇතුළු තවත් කිහිපදෙනෙකුගෙන් මේ වන විටත් ප්‍රකාශ සටහන් කරගෙන තිබේ. දැරියගේ මරණය සම්බන්ධයෙන් මහේස්ත්‍රාත් පරීක්ෂණයක් ද ඉදිරියේදී පැවැත්වීමට නියමිත බව පොලිසිය වැඩිදුරටත් ප්‍රකාශ කරයි.
No comments:
Post a Comment