මහනුවර වෙලම්බොඩ පොලිස් බල ප්‍රදේශයට අයත් මානික්කාව ප්‍රදේශයේ නිවසකින් අතිශය ඛේදනීය සිදුවීමක් වාර්තා වී තිබේ. ඒ හැත්තෑ හැවිරිදි පියෙකු වස පානය කර මියගොස් සිටීම සහ ඔහුගේ හතළිස් හත් හැවිරිදි ආබාධ සහිත දියණියගේ මළ සිරුරද එම නිවසේම කාමරයක තිබී සොයාගැනීමයි.
පියා විසින් දියණියව ඝාතනය කර පසුව ඔහු ද වස පානය කර සියදිවි හානිකරගන්නට ඇති බවට වෙලම්බොඩ පොලිසිය සැක පළ කරයි.මෙම ඛේදවාචකයේ ආරම්භය සනිටුහන් වන්නේ පසුගිය 04 වැනිදා සවස ය. එදින පස්වරු 6.00 ට පමණ නිවසට පැමිණි පියා සිය බිරිඳ සමඟ ආරවුලක් ඇතිකරගෙන තිබේ. පසුව රාත්‍රී 11.00 ට පමණ ඔහු විසින් බිරිඳව කාමරයකට දමා පිටතින් දොරගුළු වසා ඇති බව පොලිස් පරීක්ෂණ මගින් හෙළි වී ඇත. ඉන් සුළු වේලාවකට පසු දියණිය කාමරය තුළ කෑගසන ශබ්දයක් තමාට ඇසුණු බව මියගිය පුද්ගලයාගේ බිරිඳ විසින් පොලිසියට පවසා තිබේ.
පසුදින, එනම් 05 වැනිදා උදෑසන, සිරකර සිටි කාමරයෙන් එළියට පැමිණි බිරිඳ නිවස පරීක්ෂා කිරීමේදී ඇගේ සැමියා වස පානය කර ආලින්දයේ වැටී සිටින අයුරු දැක ඇත. කෙසේ වෙතත්, ඇය පිටතින් අගුළු ලා තිබූ කාමරයෙන් එළියට පැමිණියේ කෙසේද යන්න සම්බන්ධයෙන් ද පොලිසිය වෙනම පරීක්ෂණයක් පවත්වයි. ඇයගේ කෑගැසීමට පැමිණි අසල්වැසියන්ගේ ද සහාය ඇතිව වස පානය කර සිටි පුද්ගලයාව ගම්පොළ රෝහලට ඇතුළත් කිරීමට පියවර ගෙන තිබේ. අසාධ්‍ය තත්ත්වයේ පසු වූ හෙතෙම ගම්පොළ රෝහලේදී ජීවිතක්ෂයට පත්ව ඇත.
ඉන්පසුව එදින පෙරවරු 10.00 ට පමණ පොලිස් කණ්ඩායමක් අදාළ නිවසට ගොස් පරීක්ෂා කර තිබේ. එහිදී නිවසේ කාමරයක ඇඳක් මත නිසලව වැටී සිටි දියණියගේ මළ සිරුර පොලිසිය විසින් සොයාගන්නා ලදී. හැත්තෑ හැවිරිදි පියා විසින් ගෙල සිරකර දියණිය ඝාතනය කරන්නට ඇති බවට පොලිසිය සැක කරන අතර, ඒ පිළිබඳ ස්ථිර නිගමනයකට එළඹිය හැක්කේ පශ්චාත් මරණ පරීක්ෂණයෙන් පසුව බව ද පොලිසිය සඳහන් කරයි.
මියගිය පියාගේ සහ දියණියගේ මළ සිරුරු දෙකම ගම්පොළ ශික්ෂණ රෝහල වෙත ගෙනවිත් තිබූ අතර, පසුව පශ්චාත් මරණ පරීක්ෂණ කටයුතු සඳහා එම සිරුරු පේරාදෙණිය රෝහල වෙත රැගෙන යාමට කටයුතු යොදා තිබුණි. සිද්ධියට අදාළ වැඩිදුර විමර්ශන කටයුතු වෙලම්බොඩ පොලිසිය විසින් මේ වන විටත් සිදු කරමින් පවතී.
No comments:
Post a Comment