නේපාලයේ පසුගිය අගෝස්තු 26 වන දා ඇති වූ විනාශකාරී ගංවතුරින් අතුරුදහන් වූ 64 හැවිරිදි කාන්තාවක, දින දහයකට පසුව සුන්බුන් අතරින් ජීවග්රහයෙන් මුදා ගැනීමට සහන කණ්ඩායම් සමත්ව තිබේ. නුවාකොට් දිස්ත්රික්කයේ බෙත්රාවතී නම් පැරණි වෙළඳ නගරයේ පදිංචිව සිටි චන්දිකා ශ්රේෂ්ඨා නමැති මෙම කාන්තාව ජීවතුන් අතර සිටිනු ඇතැයි පැවති බලාපොරොත්තු අතහැර දැමූ ඇගේ ඥාතීන්, ඇය වෙනුවෙන් කුස තණකොළවලින් සෑදූ රූපයක් යොදාගනිමින් ආගමික අවමංගල්ය චාරිත්ර පවා ඉටු කර තිබිණි.
කෙසේ වෙතත්, සැප්තැම්බර් 5 වන දින කඩා වැටුණු ඇගේ නිවසේ සුන්බුන් අතරින් ඇයව මුදා ගැනීමට හැකිවීම අතිශය ආශ්චර්යමත් සිදුවීමක් බවට පත්ව ඇත.
නේපාල ආපදා අවදානම් අවම කිරීම සහ කළමනාකරණය පිළිබඳ අධිකාරිය සහ 'කත්මණ්ඩු පෝස්ට්' පුවත්පත වාර්තා කරන පරිදි, චන්දිකා ශ්රේෂ්ඨා තම පවුලේ තවත් සාමාජිකයින් සිව්දෙනෙකු සමඟ ගංවතුරට හසුව අතුරුදහන්ව ඇත්තේ අගෝස්තු 26 වැනිදාය. අතුරුදහන් වී අටවන දිනය වූ සැප්තැම්බර් 2 වන දා වන විට ඇය මියගොස් ඇති බවට නිගමනය කළ පවුලේ ඥාතීන්, හින්දු සමයේ මළසිරුරු සොයා ගැනීමට නොහැකි වූ විට සිදුකරන සාම්ප්රදායික කුස තණකොළ රූප අවමංගල්යය පැවැත්වූහ.
නමුත් සැප්තැම්බර් 5 වන දින උදෑසන, මාර්ග ප්රතිසංස්කරණ කටයුතුවල නිරතව සිටි නේපාල සන්නද්ධ KNPU නිලධාරීන්ට සුන්බුන් අතරින් ක්ෂීණ හඬින් නැඟුණු ඇඬීමක් ඇසී ඇත. වහා ක්රියාත්මක වූ පොලිසිය පස් සහ මඩ ඉවත් කර, නිවසේ ජනේලයක් කඩා ඇතුළුවීමෙන් පසු ඇගේ කටහඬ පැහැදිලිව අසාගෙන තිබේ. පසුව නේපාල හමුදා හෙලිකොප්ටර් යානයක් මගින් ඇයව වැඩිදුර ප්රතිකාර සඳහා කත්මණ්ඩු නුවර රෝහලක් වෙත ගුවන් මගින් ගෙන යන ලදී.
නේපාලයේ බහුලව දක්නට ලැබෙන හින්දු සහ බෞද්ධ සංස්කෘතික විශ්වාසයන්ට අනුව, මියගිය අයෙකුගේ සිරුර සොයා ගැනීමට නොහැකි වීම එම ආත්මයේ මොක්ෂයට හෙවත් සහනයට බාධාවක් ලෙස සැලකේ. එම නිසා මරණය ස්ථිර යැයි විශ්වාස කෙරෙන නමුත් සිරුර සොයාගත නොහැකි අවස්ථාවලදී, මෘත ශරීරය සංකේතවත් කරමින් කුස තණකොළවලින් රූප සාදා ආදාහන චාරිත්ර ඉටුකිරීම සාමාන්ය සිරිති. මහජන ජීවිත විශාල සංඛ්යාවක් බිලිගත් මෙම ගංවතුර ව්යසනයෙන් පසු නේපාලයේ දේවාල හා පූජනීය ස්ථාන මෙවැනි රූප අවමංගල්යයන් පැවැත්වීමට පැමිණෙන පවුල්වලින් පිරී ඉතිරී ගොස් ඇත. සැප්තැම්බර් 5 වන දින වන විට නේපාල ගංවතුරින් මියගිය සංඛ්යාව 1,375 දක්වා ඉහළ ගොස් තිබූ අතර, තවත් 5,500 කට අධික පිරිසක් අතුරුදහන්ව සිටිති.
No comments:
Post a Comment