වසර 200කට අධික කාලයකට පසු පළමු වතාවට කාන්තාවකට මරණ දඬුවම ක්‍රියාත්මක කිරීමට අමෙරිකාවේ ටෙනසි ප්‍රාන්තය සූදානම් වෙයි. 1995 වසරේදී තම 19 හැවිරිදි පාසල් මිතුරියක වූ කොලීන් ස්ලෙමර් ඝාතනය කිරීමේ වරදට මෙලෙස මාරාන්තික විෂ ශරීරගත කර මරණ දඬුවම ලබා දීමට නියමිතව ඇත්තේ 50 හැවිරිදි ක්‍රිස්ටා පයික් නමැති කාන්තාවකටය.
මෙම අපරාධය සිදුවන විට ඇයගේ වයස අවුරුදු 18ක් වූ අතර, 1820 වසරෙන් පසු ටෙනසි ප්‍රාන්තයේ කාන්තාවකට මරණ දඬුවම ලබාදෙන පළමු අවස්ථාව මෙය වන බැවින් ඇය දශක තුනකට වැඩි කාලයක් මරණ දඬුවම නියම වී සිරමැදිරියක ගත කර ඇත. ටෙනසි ප්‍රාන්ත ආණ්ඩුකාර බිල් ලී පසුගිය සඳුදා නිවේදනය කළේ දැඩි සලකා බැලීමකින් අනතුරුව ඇයට සමාව ලබා නොදීමට තීරණය කළ බවයි. මේ හේතුවෙන් ඇයගේ නීතිඥයින් විසින් මෙම දඬුවම නතර කර ගැනීම සඳහා අවසන් උත්සාහයක් ලෙස අමෙරිකානු ශ්‍රේෂ්ඨාධිකරණය වෙත පෙත්සමක් ඉදිරිපත් කර තිබේ. කෙසේ වෙතත්, ක්‍රිස්ටා පයික් NBC පුවත් සේවයට ලිපියක් යවමින් ප්‍රකාශ කර ඇත්තේ තමන් මරණයට මුහුණ දීමට බිය නොවන බවත්, ක්‍රියාවලිය ගැන පමණක් කුඩා බියක් ඇති නමුත් මේ වන විට තමන් මානසික නිදහසකින් පසුවන බවත්ය. මියගිය තරුණියගේ මව ද මෙම මරණ දඬුවම ක්‍රියාත්මක කරන අවස්ථාව දැකබලා ගැනීම සඳහා සහභාගී වීමට සූදානමින් සිටින බව වාර්තා වේ.
මෙම ඝාතනයට හේතු වී ඇත්තේ මියගිය තරුණිය තම පෙම්වතාගේ අනියම් පෙම්වතියකැයි ක්‍රිස්ටා පයික් තුළ තිබූ සැකයකි. ඒ අනුව ඇය තවත් යොවුන් වයසේ පසුවූ දෙදෙනෙකු සමඟ එක්ව කොලීන්ව හුදකලා ප්‍රදේශයකට රැගෙන ගොස් වධ හිංසා පමුණුවා ඝාතනය කර ඇති අතර, ඇයගේ සිරුරේ පංච කෝණ තරුවක (pentagram) සලකුණක් ද කපා කොටා තිබී ඇත. මෙම සිදුවීමට සම්බන්ධ වූ පයික්ගේ පෙම්වතා වූ 17 හැවිරිදි ටඩැරිල් ෂිප්ට ජීවිතාන්තය දක්වා සිරදඬුවම් නියම වූයේ ඔහු එවකට බාලවයස්කරුවෙකු වූ බැවිනි. එමෙන්ම, මෙහිදී ඔත්තු බැලීමේ නිරත වූ ෂඩොලා පීටර්සන් නමැති අනෙක් තැනැත්තිය රජයේ නීතිඥයින්ට සහාය වීම හේතුවෙන් ඇයට අත්හිටවූ සිරදඬුවම් නියම විය.
කෙසේ වුවද, පයික්ගේ නීතිඥයින් තර්ක කරන්නේ ඇය කුඩා කල මුහුණ දුන් දැඩි ලිංගික හා ශාරීරික අපයෝජනයන් මෙන්ම ඇයට වැළඳී තිබූ ද්වීධ්‍රැවීය අක්‍රමිකතාව (bipolar disorder) සහ පශ්චාත් ව්‍යසන ක්ලමථය (PTSD) වැනි රෝගී තත්ත්වයන් පිළිබඳව ජූරිය වෙත නිසි සාක්ෂි ඉදිරිපත් වී නොතිබූ බවයි. තමන් අතින් සිදුවූ වරදෙහි බරපතළකම වටහා ගැනීමට තමාට වසර ගණනාවක් ගතවූ බවත්, තමන් තවත් කෙනෙකුගේ දරුවෙකු, සහෝදරියක සහ මිතුරියකගේ ජීවිතය උදුරාගත් බවත් සඳහන් කරමින් පයික් සිය ක්‍රියාව සම්බන්ධයෙන් පසුතැවිල්ල පළ කර තිබේ. 1976 වසරේ සිට අමෙරිකාව පුරා මරණ දඬුවම නියම වූ සමස්ත පිරිසෙන් කාන්තාවන් සිටින්නේ 1%ක් පමණක් වන අතර, මෙතෙක් එලෙස දඬුවම ක්‍රියාත්මක කර ඇත්තේ කාන්තාවන් 18 දෙනෙකුට පමණි.
No comments:
Post a Comment